Nýggjur stjóri á Dátueftirlitinum

Katrin Thorsvig Hansen verður nýggjur stjóri á Dátueftirlitinum.

Katrin Thorsvig Hansen er útbúgvin løgfrøðingur, og hevur viðkomandi royndir á persónsupplýsingarøkinum, sigur Løgmansskrivstovan í tíðindaskrivi.

Nýggi stjórin á Dátueftirlitinum var samráðingarleiðari hjá danska Løgmálaráðnum, tá ið samráðingar vóru um nýggju ES-Persóndátufyriskipanina - eisini nevnd og stytt GDPR.

Hon hevur eisini havt ein týðandi leiklut í arbeiðinum at orða nýggju dátuverndarlógina í Føroyum, sum kom í gildi um ársskiftið.

Seinasta mánaðirnar hevur Katrin Thorsvig Hansen verið virkandi stjóri á Dátueftirlitinum. Hon byrjar í starvinum 1. mars.