Journalistar hava meldað krúnprinsin í Saudiarabia

Felagsskapurin "Journalistar uttan landamark" hevur meldað krúnprinsin í Saudiarabia, Mohammed bin Salman, fyri at hava dripið journalistin, Jamal Khashoggi.

Fýra aðrir saudiarabarar, sum eru í týdningarmiklum størvum, eru eisini meldaðir.

Umframt drápið á journalistin, er krúnprinsurin meldaður fyri brotsverk móti mannaættini. Talan er um brotsverk móti 35 journalistum, skrivar DR.

Jamal Khashoggi skrivaði atfinningarsamar greinar, millum annað fyri Washington Post. Hann varð dripin á saudiarabisku sendistovuni í Istanbul í oktober 2018.

Málið er meldað til ein týskan dómstól, eftir at ein frágreiðing er komin frá eini amerikanskari fregnartænastu. Har er niðurstøðan, at krúnprinsurin góðkendi, at Jamal Khashoggi varð dripin.