Vinnulívið kann draga negativa rentu frá

Eitt uppskot um negativa rentu er komið í løgtingið. Higartil hevur TAKS ikki vitað, hvussu negativ renta skal viðfarast.

Tá ið skattalógin varð gjørd, var negativ renta nevniliga ikki til, og tí varð hon ikki nevnd í skattalógini.

Lógaruppskot komið

TAKS spurdi seg fyri hjá Fíggjarmálaráðnum, hvussu negativ renta skuldi tulkast. Boðskapurin var, at negativ renta kundi ikki dragast frá.

Men nú er eitt lógaruppskot komið frá landsstýrismanninum í fíggjarmálum, Jørgeni Niclasen, sum er eitt ynski um at tryggja vinnulívinum frádrátt fyri negativa rentu á innlánskontum. 

Við uppskotinum verður staðfest, at negativ renta, tað eru rentur, sum til dømis skulu rindast fyri at hava pening standandi í einum peningastovni, skal hava rætt til frádrátt, á sama hátt sum rentur, sum skulu rindast av skuld.