Castro leggur frá sær á Kuba

Castro-tíðarskeiðið á Kuba endar nú. Raúl Castro kunngjørdi í gjár, at hann leggur frá sær sum leiðari fyri kommunustaflokkin á Kuba. Tað skrivar millum onnur BBC.

Raul Castro, sum er 89 ára gamal, segði við flokkskongressina í gjár, at hann nú gevur valdið víðari til eitt yngri ættarlið, sum er fult av eldhuga og anti-imperialistiskum anda.

Raul Castro tók við valdinum, tá beiggi hansara, Fidel Castro, gjørdist sjúkur í 2006. Fidel Castro hevði tá havt valdið í Kuba síðani kollveltingina í 1959, og tí hava Castro-brøðurnir tilsamans havt í meir enn 60 ár.

Avloysarin í eygsjón

Eygleiðarar vænta, at nýggi leiðarin fyri kommunistaflokkin verður Miguel Díaz-Canel. Hann tók við sum forseti í Kuba í 2018.

Tað verður ein stór uppgáva, sum stendur fyri framman hjá nýggja kubanska leiðaranum, tí sambært BBC, er Kuba mitt í einari tí ringastu búskaparkreppuni í áratíggju. Eitt nú minkaði búskapurin í Kuba við 11 prosent í fjør av koronufarsóttina.

Hóast Raúl Castro nú leggur frá sær, segði hann í gjár, at hann framvegis ætlar at hava ein fót inni í politisku skipanini. Tí vænta eygleiðarar, at tað verður torført hjá nýggja leiðararnum at gera stórvegis broytingar ta fyrstu tíðina.