Nógv smitta: Svøríki leingir tiltøkini

Tað segði svenski forsætisráðharrin, Stefan Löfven, á tíðindafundi í gjár, skrivar Ritzau. Ætlanin var at linka krøvini frá 3. mai, men koronusmittan heldur fram við at vaksa, og tí verða tiltøkini longd, segði forsætisráðharrin.

Tað hevur við sær, at matstovur og skeinkistøð framvegis skulu lata aftur klokkan 20:30, og mark er fyri, hvussu nógv fólk kunnu vera til handils samstundis.

8.000 smittað í gjár

– Støðan er framvegis hættislig, tí fleiri gerast sjúk, og fleiri verða løgd inn á sjúkrahús. Tí mugu avmarkingarnar halda fram, segði Stefan Løfven.

Í Svøríki ger triðja aldan av koronu um seg í løtuni, og Kypros er einasta landið í Europa, har smittan breiðir seg skjótari enn í Svøríki.

Í gjár vóru næstan 8.000 fólk í Svøríki smittað aftrat, samstundis sum yvir 400 fólk liggja á intensivari deild á sjúkrahúsunum og 19 fólk doyðu.