Útflutningur av makreli og sild nógv vaksin

Hagtøl, sum granskingargrunnurin, Sjókovin, hevur skipað í eini ársfrágreiðing fyri fiskivinnuna, sum ætlanin er at gera árliga, vísa, at útflutningurin av sild, makreli og svartkjafti er vaksin úr 13.000 tonsum í 1993 upp í 243.600 tons.

Útflutingurin av uppsjóvarfiskinum hevur verið støðugt vaksandi, og samanborið við hini fiskasløgini er hesin útflutinginurin vaksin øgiliga nógv.

Útflutningsvirðið vaksið nógv

Nøgdin av hýsu, upsa og toski, sum vit hava útflutt, liggur umleið tað sama sum í 1993: Um tey 40.000 tonsini og hann hevur verið minkandi síðani 2002 eftir nøkur ár, tá vøksturin var lítil.

Nøgdin av laksi og síli er eisini vaksin, men ikki so nógv sum uppsjóvarfiskurin. Hinvegin er útflutningsvirðið í hesari vinnuni vaksið nógv. Í 1993 útfluttu vit minni enn 20.000 tons av laksi og sílum. Í 2020 var nøgdin upp ímóti 60.000 tons.

Útflutningsvirðið hinvegin er fleirfaldað úr 500 milliónum upp í 3,3 milliardir hesi árini. Útflutningsvirðið á uppsjóvarfiskinum er vaksið úr 20 milliónum í 1,7 milliardir.