Kommunali geirin hall triðja árið á rað

Triðja árið á rað er hall í kommunala geiranum, sigur Kommunufelagið í ársfrágreiðingini, sum kom í samband við aðalfundin, sum var í gjár.

Árið 2020 er ikki endaliga gjørt upp enn, men mett verður, at hallið hjá kommunum verður meira enn 220 milliónir. Hetta er triðja árið á rað, at hall er í samlaða kommunala geiranum.

Rakstraryvirskotið 670 milliónir

Í 2019 var hallið 176 milliónir krónur, og í 2018 var hallið 113 milliónir, men árini frammanundan var talan fyri tað mesta um avlop, sigur Kommunufelagið.

Rakstrarútreiðslurnar hjá kommunum vóru í fjør tilsamans 2.124 milliónir krónur, og inntøkurnar vóru 2.794 milliónir krónur. Hetta gevur yvirskot uppá 670 milliónir krónur.

Men tá íløgurnar, sum verða mettar at vera 894 milliónir krónur, verða tiknar við, hava kommunurnar samlað eitt hall uppá umleið 224 milliónir krónur.