Byggja felags bygning til goymslu og skrivstovu á havnarlagnum

Tórshavnar havn og Smyril Line skulu í felag byggja ein bygning, sum skal hýsa goymslu og skrivstovu hjá Smyril Line og farstøð hjá Tórshavnar havn.

Uppskot er gjørt um avtalu og sáttmála, og tað verður viðgjørt á býráðsfundinum í Havn í kvøld.

Tórshavnar havn eigur farstøðina, sum nú er, og trapputornið har.

Trapputorn til Norrønu

Tá gamla Norrøna kom, varð farstøðin, sum Strandferðslan brúkti til Smyril, tillagað.

Tá nýggja Norrøna kom, bleiv trapputornið bygt afturat farstøðini.

Og tá bygdi Smyril Line afturat einum pakkhúsi hjá Tórshavnar havn.