Gíslatikin sjófólk skulu hava rætt til sjúkrarøkt og hýru í 16 vikur

Gíslatikin sjófólk skulu hava rætt til sjúkrarøkt og hýru í 16 vikur
Sjófólk, ið verða tikin gísli undir sjóráni og vápnaðum ráni, fáa betri treytir
Mynd: Tilvildarlig mynd  
 
13.07.2021 - 09:33

Rættindi hjá sjófólki undir sjóráni og vápnaðum ráni verða nú nágreinað í lógini um starvsviðurskifti hjá sjófólki.

Lógin skal broytast, so hon svarar til ILO-sáttmálan, sum Føroyar eru við í.

Í hesum førinum er talan um MLC-sáttmálan um starvsviðurskifti hjá sjófólki.

Nýggjar reglur komu í honum 26.desember í fjør.

 

Í minsta lagi 16 vikur

Tær eru um rættindi hjá sjófólki undir sjóráni og vápnaðum ráni. 

Ítøkiliga er millum annað talan um at nágreina reglurnar um sjúkrarøkt og sjúkrahýru, so tær eru galdandi í minsta lagi í 16 vikur í staðin fyri upp til 16 vikur.

Og ásetingin um siglingarbøkur skal broytast, so sjófólkið - og ikki skiparin sum nú - hevur siglingarbókina í varðveitslu.

 

Rætt til løn og aðrar samsýningar

Broytingin fer at gera, at sjófólk hava rætt til løn og aðrar samsýningar, um tey verða tikin sum gíslar. 

MLC-sáttmálin er bara galdandi fyri handilsskip.

Uppskotið um at broyta lógina er sent til hoyringar. Hoyringarfreistin er til 25.august.


 

Er kopiera
Nýggjastu sendingar í ÚV
Nýggjastu sendingar í SV
Týsdag 26. mars
Veðrið
172832
Mánadag 25. mars
Beautyvarpið við Tanju
172718
Sunnudag 24. mars
Mein fyri lívið
172652