Sáttmáli um Íshavið komin í gildi

Danska uttanríkismálaráðið hevur sett sáttmálan, sum skal forða fyri óskipaðum fiskiskapi altjóða sjógvi í Íshavinum, í gildi í Føroyum við kunngerð.

Sambært kunngerðini kom sáttmálin í gildi í Føroyum 25.juni í ár.

Hann er galdandi í 16 ár.

Løgtingið hevur góðkent, at sáttmálin verður galdandi í Føroyum.

Forðar fyri óskipaðum fiskiskapi

Endamálið við sáttmálanum, sum varð gjørdur í 2018, er at seta í verk fyribils tiltøk, sum skulu forða fyri óskipaðum fiskiskapi í økinum til ein ella fleiri fiskiveiðifelagsskapir eru settir á stovn fyri Íshavið. 

Langtíðarmálið er at tryggja burðardygga veiðu í altjóða sjógvi í Íshavinum.

Sáttmálin bindur tey londini, sum staðfesta hann, til ikki at fara undir vinnuligan fiskiskap í Íshavinum í 16 ár, uttan so, at semja er um hetta í nýggjum ella verandi fiskiveiðufelagsskapi, sum umfatar Íshavið.