90 prosent av dønum skulu koppsetast

- Málið er at 90 prosent av fólkatalinum skulu vera koppsett 1. oktober.

Tað segði danski forsætisráðharrin, Mette Frederiksen, á tíðindafundi í dag.

Danska stjórnin hevði kallað inn til tíðindafundar um eina støðulýsing um koronustøðuna í landinum, og høvuðsboðskapurin hjá forsætisráðharranum var, at nú verður nógv orka sett av til at røkka málinum, um at níggju av 10 dønum skulu vera koppsettir 1. oktober.

Forsætisráðharrin segði at støðan við farsóttini er góð í løtuni, og Magnus Heunicke, heilsumálaráðharri, legði aftrat, at farsóttin nú er um at broytast, so hon verður ein farsótt millum tey, sum ikki eru koppsett.

Triðja prikið

Magnus Heunicke segði eisini, at Danmark fer at bjóða borgarum triðja prikið, men støða er ikki tikin til, nær tað verður.

Í fyrstu syfta fáa tey, sum eru í vandabólki, tilboð um at verða koppsett eina ferð aftrat.

Sambært heimasíðuni hjá danska kringvarpinum eru í løtuni umleið 70 prosent av dønum liðugt koppsett. Sostatt mangla 20 prosent fyri at røkka málinum, sum nú er 90 prosent.

Til samanberingar eru góð 63 prosent av føroyingum liðugt koppsett.