- Tíðindi, mentan og ítróttur
Flutningsfeløgini hugað at sigla farm um Suðuroyarfjørð
![](https://kvf.fo/sites/default/files/styles/grein-ovasta-mynd/public/img_1534.jpg?itok=V_k70N8y)
Strandferðslan og landsstýrismaðurin í fíggjarmálum hava viðgjørt møguleikarnar fyri farmaflutningi um Suðuroyarfjørð aftrat siglingini hjá Smyrli, og nú skal ein politisk semja finnast.
Tað upplýsir Jørgen Niclasen, landsstýrismaður, í svari til Bjarna Hammer, sum hevur spurt um málið.
Jørgen Niclasen sigur, at samrøður hava verið við privatu flutningsfeløgini um møguleikar fyri, at flutningsfeløgini kunnu átaka sær at sigla farm til Suðuroyar og úr Suðuroy nakrar ferðir um vikuna.
Neyðugt at játta pengar
Flutningsfeløgini hava tikið væl ímóti hugskotinum. Men feløgini leggja dent á, at skal kostnaðurin at flyta farm ikki hækka, er neyðugt at játta pening til endamálið.
Jørgen Niclasen sigur, at arbeitt verður við málinum politiskt.
Hann sigur seg hava vónir um, at tað fer at bera til at finna eina politiska semju, sum kann tryggja farmaflutning á Suðuroyarleiðini, eins og samgongan gjørdi fyri Sandoyarleiðina í fjør.
Tá var Hasfjord keyptur og settur í sigling um Skopunarfjørð aftrat Teistanum.