Bústaðir: Uppskotið um starvsskipan tikið aftur

Uppskotið um starvsskipan fyri Bústaðir er tikið aftur.

Tað upplýsir Elsebeth Mercedis Gunnleygsdóttir, landsstýriskvinna í bústaðamálum, í svari til Beintu Løwe, løgtingskvinnu.

Nógv rok stóðst av málinum um starvsskipan fyri Bústaðir, sum ein meiriluti í stýrinum fyri Bústaðir samtykti eftir uppskoti frá táverandi stýrisformanninum, Regini Hammer.

Uppskotið skuldi sendast Almannamálaráðnum til góðkenningar.

Tikið aftur

Beinta Løwe spurdi Elsebeth Mercedis Gunnleygsdóttir, um hon hevur góðkent broytingina í starvsskipanini.

Landsstýriskvinnan svarar stutt, at  Bústaðir hava kunnað ráðið um, at uppskotið um starvsskipan er tikið aftur.

Herfyri umskipaði stýrið fyri Bústaðir seg við Onnu Mariu Joensen sum forkvinnu. Regin Hammer, sum var formaður, er nú vanligur stýrislimur. 

Tá hon tók við sum forkvinna, segði Anna Maria Joensen, at nú fer stýrið at líta frameftir.