Bakkafrost minkaði fimm milliardir í virði

Virðið á partabrøvunum í Bakkafrosti lækkaðu nógv í morgun, tá felagið hevði almannakunngjørt úrslitið fyri triðja fjórðingsár. Partabrøvini lækkaðu 13 prosent.

So stórt fall hevur bert verið einaferð fyrr, og tað var í februar í fjør, tá virðið lækkaði góð 17 prosent.

Samlaða virðið á felagnum fall fimm milliardir krónur, niður í 40 milliardir kr.

Regin og Oddvør mistu 900 mió. á pappírinum

Stjórin, Regin Jacobsen, og mamman, Oddvør Jacobsen, eiga 15 prosent í Bakkafrosti. Lækkingin hevði við sær, at tey á pappírinum mistu 900 milliónir kr., skrivar Dagens Næringsliv.

Bakkafrost sigur seg rokna við at taka 30.000 tons av laksi í Skotlandi í ár. Fyrr hevur tøkan verið mett til 40.000 tons.

Og samlaða tøkan av laksi verður í ár mett til 96.000 tons samanborið við 106.000 tons, sum fyrr hevur verið mett.