Mæla til tveir tímar í týskum í sjeynda flokki

Næmingar fáa tveir tímar í týskum í 7. flokki, stendur tað til arbeiðsbólkin, sum hevur gjørt tilmæli um fremmandamál í skúlaverkinum.

Tað skrivar Skúlablaðið.

Fólkaskúlanæmingar læra í dag danskt í 3. flokki og enskt í 4. flokki. 

Sambært paragraf §5. stk. 4 í fólkaskúlalógini skal týskt (ella annað fremmandamál) standa næmingunum í boði í 8. og 9. flokki.

Gongur ov long tíð

Grundgevingin at flyta týskt niður í 7. flokk, er, at arbeiðsbólkurin metir, at ov long tíð gongur, til næmingar hava møguleika at læra tað triðja fremmanda málið.

Tímatalvan í fólkaskúlanum er nóg full, og tí er ætlanin ikki at økja um tímatalið, men at flyta tímar í skipanini, sigur arbeiðsbólkurin.

Tað var í januar í ár, at landsstýrismaðurin í skúlamálum setti ein arbeiðsbólk at gera uppskot um ítøkiligar tillagingar í fólkaskúlanum og á miðnámi, sum hava til endamáls at styrkja støðuna hjá fremmandamálum í føroyska skúlaverkinum.