Ávaring um virus í Evropa, sum kann elva til lamning hjá børnum

Í ráum tølum eru lutfalsliga fá sjúk, men smittutølini vaksa, og ikki allir tilburðir vera greinaðir, skrivar Ugeskrift for læger.

Virusið eitur Entero-virus D68 (EV-D68).  Tað kann smitta fólk í øllum aldri og elvir í flestu førum til mildan hálsbruna, men tað kann eisini elva til álvarsliga lungnasjúku, - t.d. astma.

Annars frísk børn kunnu í sjáldsomum førum eisini fáa smittuna, - Í 2014 fekk eitt í Hollandi enterovirus. Barnið klárari smittuna, men gjørdist fjølbrekað, skrivar Ugeskrift for læger. Talan kann sostatt vera um álvarsligar avleiðingar av hesi virussjúkuni, sum í løtuni spjaðir seg í Evropa.

Í familju við poliovirus

Í átta londum í Evropa eru tilsamans 139 tilburðir staðfestir í tíðarskeiðunum frá januar til miðskeiðis í oktober í ár.  Flest smittað eru dreingir yngri enn fimm ár. Flestu tilburðirnir hava verið í Wales, Belgia, Fraklandi og Spania.

Frábrigdið er í familju við poliovirus, men tað smittar øðrvísi. Polio smittar umvegis munn og tarmar, men entero-virus smittar gjøgnum andingarleiðirnar.

Sjúkutekin eru hjá flestu sjúklingum vanligt krím, men nøkur fá - serliga børn og ung, gerast trong fyri andanum og fáa tekin um nervasjúku - eitt nú gerast tey veikari ella fáa lammilsi í armar og bein, tey hava ilt við at tosa og mugu hava hjálp at anda, orsakað av bruna í mønuni, skrivar Ugeskrift for læger.