Fleiri evropisk lond seta met í smittutølum.

Í Føroyum vóru í gjár staðfestir 180 smittutilburðir og tað er tað mesta, sum er staðfest ein einstakan dag. Gamla metið var 111 tilburðir upp á eitt samdøgur.

Eisini í Fraklandi setti talið av smittutilburðum met í gjár við nærum 180.000 tilburðum. Tað er væl meiri enn gamla metið, sum var slakar 105.000 tilburðir.

Í Grikkalandi eru seinasta samdøgrið staðfestir 21.657 tilburðir. Tað er meir enn tvífalt so nógv sum gamla metið, ið var 9.284 tilburðir.

Bretland og Portugal hava eisini sett nýtt met í smittutølum seinastu dagarnar.

Tað er allarhelst omikron-frábrygdið, sum smittar sera illa, ið ger, at nýggj met verða sett. Men líkt er til, at omikron-frábrygdið ikki rakar so hart, sum onnur frábrygdi av covid-19, samstundis sum ein alsamt størri partur av fólkinum verður koppsettur, tí talið av innleggingum í samband við koronu hækkar ikki samsvarandi.