Sløkkiliðið í Havn: Tendrið hasardljósini, hitan og útvarpið, vit eru á veg

Politiið mælti tíðliga í morgun fólki frá at fara út at koyra í ringa kavastorminum í løtuni, men ikki øll tóku ráðini til sín. 

Úrslitið er, at nógvir bilar standa fastir í kavanum, eitt nú uppi við kirkjuna í Hoyvík. 

Heini Østerø, leiðari á Tórshavnar sløkkiliði, sigur við Góðan morngun Føroyar, at rættiliga nógvir fólk hava koyrt seg føst í Havnini. 

"Her er ein lang kø, og vit gera alt tað, ið vit kunnu, fyri at koma fólk til hjálpar," sigur Heini Østerø. 

Sløkkiliðsleiðari biður fólk tendra hasardljósini, hitan í bilinum og so útvarpið, sum fylgir við støðuni. 

"Men um bilurin blívur kaldur, og fólk ikki hava tað gott, so mugu tey ringja til 112," sigður Heini Østerø, leiðari í Tórshavnar sløkkiliði.