USA: Russland fer at gera innrás í Ukraina

USA ávarar nú ímóti, at Russland fer at gera innrás í Ukraina, nær tað skal vera. Amerikanskir embætismenn siga, at kreppan nú er á einum álvarsligum stigi, skrivar Ritzau.

- Vit halda, at støðan er so mikið álvarslig, at Russland, nær tað skal vera, kann gera innrás í Ukraina, sigur talsmaðurin í Hvítu Húsunum, Jen Psaki, við fronsku tíðindastovuna, AFP.

Tað eru venjingar hjá russiskum hermonnum í Hvítarusslandi, sum kunnu hava við sær innrás í Ukraina, siga amerikansku embætismenninir.

Russland ætlar ikki at leypa á

Russland vísir tíðindunum aftur, og russiska sendistovan í USA tvíheldur um, at Russland fer ikki at leypa á nakað land. Tað skrivar sendistovan á facebook, skrivar russiska tíðindastovan, Tass.

- Venjingina við at flyta herfólk á egnari jørð, hava vit rætt til. Vit mæla til, at ágangurin steðgar, og ikki ger støðuna spentari enn neyðugt, skrivar russiska tíðindastovan í USA.

Blinken í Ukraina

Amerikanski uttanríkisráðharrin, Antony Blinken, kom til Ukraina í morgun, har hann skal hitta leiðsluna í landinum.

Eftir fundin í Kiev, fer hann beinleiðis til Berlin, har hann fer at hitta umboð fyri Týskland, Frakland og Bretland, og amerikanski uttanríkisráðharrin skal hitta russiska uttanríkisráðharran, Sergej Lavrov, í Geneve fríggjadagin.