Landsliðið við kvinnum nýggjan hjálparvenjara

Svenn Olsen hevur loyst Christian Høgna Jacobsen av sum hjálparvenjari hjá føroyska fótbóltslandsliðnum við kvinnum, skrivar fsf.fo.

Svenn Olsen hevur UEFA A-venjaraprógv og drúgvar royndir sum høvuðs- og hjálparvenjari í føroyskum fótbólti. Hann hevur staðið á odda fyri liðum í bestu kvinnu- og mansdeildini, og seinastu árini hevur hann verið hjálparvenjari hjá besta mansliðnum hjá Víkingi. 

– Uppgávan at lyfta og menna føroyskan kvinnufótbólt og fótbólt yvirhøvur er stór, og eg eri glaður fyri at kunna vera við á tí ferðini. A-landsliðið hjá kvinnum er eisini í menning, og eg haldi sum heild, projektið vera spennandi og vert at satsa uppá. So eg gleði meg ordiliga nógv til at koma í gongd, sigur Svenn Olsen við heimasíðuna hjá Fótbóltssambandinum.

Nýggi hjálparvenjarin verður við til sína fyrstu A-landsliðsvenjing nú mánakvøldið, tá kvinnurnar seta hol á fyrireikingarnar til venjingarleguna í Marbella í februar. Á venjingarleguni skulu kvinnurnar spæla vinardystir móti Gibraltar og Norðurírlandi, áðrenn HM undankappingin verður tikin upp aftur í apríl.