285.000 krónur fyri eina skemtitekning av Den Lille Havfrue

Ein skemtitekning og ein mynd av lítlu Havfrúnni í munnbindi var nóg mikið hjá Eystara landsrætti. 

Danska blaðið, Berlingske, skal rinda arvingunum hjá myndhøggaranum, Edvard Eriksen, 285.000 krónur í bót, fyri at bróta upphavsrættin. 

Tað skrivar danski miðilin, Journalisten.

Um sjey ár verður tað ókeypis

Arvingar hjá Eriksen hava í fleiri ár sent pengakrøv til danskar miðlar, tí teir bróta upphavsrættin tá ið teir brúka myndir av standmyndini av lítlu Havfrúnni á Lange Linje í Keypmannahavn í øðrum samanhangi enn í tíðindum um Lítlu Havfrúnna..

Berlingske hava fingið krav um 10.000 krónur, fyri at nýta standmyndina í eini myndasýning, sum ikki hevði beinleiðis tilknýti til tíðindi.

Arvingarnir loyva bara gjaldfríum miðlum at brúka myndir av havfrúnni í tíðindahøpi um sjálva standmyndina.

Tað verður ikki fyrr enn um sjey ár, at miðlar frítt kunnu vísa mydnir av Lítlu Havfrúnni. Tá hevur listamaðurin, Edvard Eriksen, verið deyður í 70 ár, og tað fellur upphavsrætturin burtur.