Endurnýggja asfalt- og skervverk fyri 34,5 mió. kr.

Asfaltverkið og skervverkið hjá Landsverki á Sundi skulu endurnýggjast fyri 34,5 mió. kr.

Lógaruppskot um tað er komið í løgtingið.

10 milliónir vóru brúktar í fjør, 18 milliónir skulu brúkast í ár og 6,5 milliónir næsta ár. 

Skervverkini í Hundsarabotni, á Hústoft og í Porkeri skulu niðurleggjast, eisini asfaltverkið í Hundsarabotni.

Í staðin fyri tey trý skervverkini ætlar Landsverk at útvega eitt nýtt flytført skervverk.

At tey fýra verkini verða niðurløgd hevur ongar uppsagnir við sær, stendur í lógaruppskotinum. 

Avlop

Samstundis sum íløgan er so stór, verður rakstrarjáttanin til Landsverk lækkað, tí avlop er í inntøkufíggjaðum virksemi.

Verkini hava kostað seks til átta mió. kr. í viðlíkahaldi um árið.

Men eftir endurnýggjanina verða útreiðslurnar mettar at verða minni enn tríggjar mió. kr. árliga, stendur í lógaruppskotinum. 

Landsstýrið hevur biðið um sjey mió. kr. í eyjajáttan í ár til asfaltverkið og skervverkið.

Yvirtikið í 2018

Landsverk yvirtók asfaltverkið á Sundi endaliga í 2018.  

10 milliónir vóru brúktar í 2018, 2019 og 2020 til asfaltverkið og seks milliónir til flytføra skervverkið.

Tilsamans kosta bæði verkini tí 50,5 mió kr.