Stoltenberg stúrir fyri, at Russland brúkar evnafrøðilig vápn

Aðalskrivarin í Nato, Jens Stoltenberg, sigur, at hann stúrir fyri, at Russland fer at fremja álop við evnafrøðiligum vápnum, undir følskum flaggi.

Á tíðindafundi í Brússel seinnapartin segði Stoltenberg, at innrásin hjá Russlandi í Ukraina hevur elvt til ruðuleika, deyða og oyðilegging.

- Russland hevur skelkað heimin og skakað altjóða skilhaldsreglur, segði Stoltenberg á tíðindafundinum, og hann helt fram:

Lygnir

- Vit hava sæð langan lista hjá Russlandi við lygnum. Teir skuldu ikki gera innrás í Ukraina, men teir gjørdu innrás í Ukraina. Teir skuldu taka herdeildir aftur,  men teir gjørdu tað øvuta. Teir skuldu verja sivilfólk, men teir drepa sivilfólk.

- Nú koma teir við uppáhaldum úr leysum lofti um evnafrøðilig vápn. Hetta er enn ein lygn, segði Stoltenberg, nú Russland leggur Nato-lond undir at hava verksmiðjur, sum gera evnafrøðilig vápn í Ukraina.

- Putin, forseti, hevur ábyrgdina av innrásini. Putin kann gevast við krígnum nú, segði Stoltenberg.