Frítekst tagging:
- Tíðindi, mentan og ítróttur
Ukrainar yvirgeva ikki Mariupol til russar
Ukrainar yvirgeva ikki Mariupol til russar
Russar hava bumbað bústaðar- og handilsøki í Kyiv, siga ukrainar, ið nokta at yvirgeva Mariupol til russar
Ógvuslig álop hava verið á bústaðar- og handilsøkið, Podil, sum liggur norðanfyri miðbýin í Kyiv
Mynd: Ritzau / Scanpix
21.03.2022 - 06:49
Minst fýra fólk lógu eftirá í einum bumbuálopi á høvuðstaðin í Ukraina, Kyiv, í gjárkvøldið.
Borgarstjórin í Kyiv, Vitali Klitschko, upplýsir í morgun, at ógvuslig álop hava verið á bústaðar- og handilsøkið, Podil, sum liggur norðanfyri miðbýin í Kyiv.
- Nógvar spreingingar hava verið at hoyrt, skrivar boprgarstjórin. Fólk royna at hjálpa í økinum, sigur hann.
Higartil er boðað frá, at minst fýra fólk lógu eftirá í álopunum.
Tíðindastovan, Reuters, skrivar, at tað ikki hevur borið til at fáa tíðindini váttað.
Tíðindamaðurin hjá danska TV2, Benjamin Kúrstein, segði soleiðis um støðuna í Kyiv í morgun:
Alop_a_Kyiv
Biden til Póllands
Amerikanski forsetin, Joe Biden, fer fríggjadagin til Póllands at umrøða kríggið í Ukraina við pólska forsetan, Andrzej Duda.
Tað upplýsa Hvítu húsini.
- Amerikanski forsetin ynskir at umrøða, hvat tey sameindu kunnu gera við mannarættindakreppuna í Ukraina, sum russiska álopið hevur elvt til, skrivar Jen Psaki, talsmaður í Hvítu húsunum.
- Forsetin hevur ongar ætlanir um at fara til Ukraina, leggur hann aftrat.
Pólland hevur tikið ímóti nógvum flóttafólkum úr Ukraina. Tey eru meir enn tvær milliónir í tali.
Ukrainar yvirgeva ikki Mariupol
Ukraina fer ikki at geva seg yvir í Mariupol, hóast støðan er ring í býnum. Tey boðini hava russisku myndugleikarnir fingið frá ukrainsku myndugleikunum í nátt.
- Tað kemur ikki uppá tal at leggja vápnini í býnum, og lata býin upp í hendurnar á russum, sigur ukrainski varaforsætisráðharrin, Iryna Vereshchuk, við bretska blaðið The Guardian.
Hon leggur samstundis dent á, at ein leið eigur at verða skipað, so fólk sleppa úr býnum.
Russiska verjumálaráðið boðaði í gjár frá, at ukrainsku hermenninir høvdu til klokkan trý í nátt at leggja vápnini í Mariupol, og at geva seg yvir.
Men tað hendi ikki, skrivar bretska blaðið.
Verja seg móti vandamiklum gassum
Fólk í ukrainska býnum, Sumy, hava fingið boð um at verja seg ímóti vandamiklum gassum, eftir at russisk flogfør bumbaðu eina ammoniakverksmiðju við býin í nátt,
Tað sigur guvernørurin í býnum, Dmytro Zjyvyskyj, við ukrainska miðilin, Kyiv Independent.
Serliga fólk í tveimum býarpørtum, sunnanfyri Sumy, sum hava fyri neyðini at verja seg, sigur guvernørurin.
Higartil er ammoniak at merkja meir enn tveir kilometrar frá verksmðjuni, sigur guvernørurin.
Er kopiera
Nýggjastu sendingar í ÚV
