Russland skrúvað fyri krananum til Póllands og Bulgaria

Russland stongir í dag fyri gassi til Póllands og Bulgaria. 

Tað boðaðu polska gassfelagið, PGNiG, og bulgarska, Bulgargaz, frá í gjár.

26. apríl kunnaði Gazprom PGNiG um ætlanirnar um at skrúva fyri gassveitingini 27. apríl, sigur pólska felagið.

Orsøkin er, at pólska felagið vil ikki rinda fyri gassið í russiskum rublum, sum Russland krevur. 

Pólska felagið sigur, at Russland við kravinum, um at rindast skal við rublum, brýtur sáttmálan millum partarnar.

Hetta er eisini sama orsøk fyri, at gassveitingin til Bulgaria steðgar, upplýsti bulgarska orkumálaráðið í gjár.

Hava fyrireikað seg

Pólski varauttanríkisráðharrin, Marcin Przydacz, sigur, at Pólland hevur fyrireikað seg til hesa støðuna. 

- Eg eri rættiliga vísur í, at vit fara at klára hesa støðuna, sigur Marcin Przydacz við BBC í morgun.

Pólland arbeiddi longu við ætlanini um at gevast við at keypa gass úr Russlandi 1. januar næsta ár, tá ið sáttmálin við Gazprom fer úr gildi.

PGNiG sigur, at gassgoymslurnar eru 80 prosent fullar. Summarið nærkast, og tá minkar eftirspurningurin.

Pólland hevur eisin aðrar veitarar,  eitt nú ein terminal við flótandi natúrgassi, LNG, í Swinoujscie.

1. mai verður nýggja gassleiðingin millum Pólland og Litava tikin í nýtslu.

Nýggj rørleiðing við gassi úr Noregi, nevnd Baltic Pipe, verður tikin í nýtslu í oktober. Um ársskiftið koyrir hon vil fullari ferð, og gassið úr Noregi kann koma í staðin fyri russisku veitingina.