Russiskt hernaðarflogfar var í donskum loftrúmi

- Vit rokna við, at tað var tilvitað, sigur Anders Puck Nielsen frá Verjuakademiinum við TV2.

Hann sigur, at Russland ger tað fyri at royna og kanna donsku tilbúgvingina, og samstundis senda boð um, at Danmark ikki skal kenna seg ov trygt.

Russiska hernaðarflogfarið var ikki leingi í donskum loftrúmi.

Flogfarið fleyg nakað omanfyri ein kilometur, áðrenn tað flutti seg yvir í svenskt loftrúm.

Jeppe Kofod, uttanríkisráðharri, sigur, at hendingin kann als ikki góðtakast.

Russiski sendimaðurin í Danmark er eisini biðin um at koma á fund í danska Uttanríkisráðnum í morgin.

Í somu løtu, sum russiska hernaðarflogfarið varð skrásett í danska loftrúminum og ikki svaraði boðum frá donskum myndugleikum, vóru donsk hernaðarflogfør send í luftina sum ávaringartekin.

Anders Puck Nielsen frá Verjuakademinum roknar ikki við, at hetta er seinastu ferð, at russisk hernaðarflogfør fara inn í danskt loftrúm.

- Danmark hevur stuðlað Ukraina í krígnum, og tað nívir hjá russarum.

- Vit kunnu avgjørt rokna við, at hetta fer at henda aftur, sigur Anders Puck Nielsen við TV2.