Flyta aftur fólk úr Mariupol

156 sivilfólk sluppu í gjár úr stálverkinum í Mariupol, og ætlanin er at flyta fleiri úr økinum í dag, um umstøðurnar loyva tí.

Tað skrivar ukrainski varaforsætisráðharrin, Iryna Vereshcuk, á Facebook.

Eftir ætlan skuldu bussar fara at flyta fólk úr stálverkinum klokkan seks okkara tíð í morgun. Samstundir er ætlanin at flyta fóilk úr øðrum pørtum av Mariupol.

Ukrainski forsetin, Zelenskyj, segði tað sama, tá hann helt røðu fyri fólkinum í gjárkvøldið.

Vápnahvíld ikki hildin

Hann segði, at ein vápnahvíld var gjørd, sum skuldi vara í tríggjar dagar, men russar hava ikki hildið avtaluna.

Í morgun siga tíðindi, at russar aftur eru farnir undir at royna at taka stálverkið, og at bumbað verður við flogførum, og rakettir verða skotnar eftir stálverkinum.

Í gjárkvøldið vóru rakettir skotnar inn í býin, Lviv. Tað hevði við sær, at ljósið fór í pørtum av býnum, og fleiri jarnbreytarstøðir fingu skaða.