Treyt fyri kornútflutningi er, at revsitiltøk verða strikað

Russland krevur, at nøkur av revsitiltøkunum verða strikað, afturfyri at kornúflutningurin úr ukrainskum havnum skal byrja aftur, sum ST-aðalskrivarin, Antonio Guterres, hevur biðið um. Tað skrivar NTB.

- Um londini vilja finna eina loysn á kornútflutningininum, má ein loysn finnast á revsitiltøkunum móti Russlandi, sigur russiski varauttanríkisráðharrin, Andrej Rudenko.

Altjóða samfelagið, ST íroknað, hevur í fleiri vikur kravt, at Russland letur upp fyri stongslinum av ukrainskum havnum og loyvir, at korn úr Ukraina kann flytast út, nú matur trýstur nógvastaðni í heiminum.

28 prosent av øllum hveiti

Russland og Ukraina útflyta sera nógv hveiti og korn. Í fjør útfluttu bæði londini tilsamans 28 prosent av øllum hveiti í heiminum. Millum annað lond í Miðeystri og Norðurafrika eru bundin av at innflyta hveiti úr Ukraina.

Guterres sigur, at hann hevur roynt við nógvum samrøðum við Russland, Ukraina, Turkaland, USA og ES fyri at finna eina loysn. 

Rudenko sigur, at tað eru fleiri aðrar orsøkir til matvørukreppuna og høgu prísirnar í heiminum, millum annað revsitiltøkini, sum USA og ES hava sett móti Russlandi.