21 festisýn seinastu tvey árini

Búnaðarstovan hevur gjørt 21 festisýn seinastu tvey árini. 

Tey 21 festisýnini eru serliga framd í sambandi við festaraskifti, men Búnaðarstovan hevur eisini sýnað festi, sum kært er um, og leigutraðir.

Tað svarar Magnus Rasmussen, landsstýrismaður í búnaðarmálum, í einum fyrispurningi, sum Helgi Abrahamsen, tingmaður fyri Sambandsflokkin, hevur sett. 

Tilgongd steðgað

Í svarinum verður upplýst, at festisýnini vóru slept, tá ið farið varð undir at einskilja ta almennu jørðina fyri nøkrum árum síðani.

Hendan tilgongdin bleiv steðgað, men lógarverkið, sum millum annað strikaði festisýnini av almennari ogn, bleiv ikki broytt aftur til at endurspegla støðuna, at jørðin framvegis er almenn. 

Lógin bleiv tó dagførd fyri tveimum árum síðani, soleiðis at Búnaðarstovan nú aftur hevur festisýn.

Nú verður arbeitt við at fáa festisýnini í eina meira skipaða legu soleiðis, at øll festi verða sýnað við regluligum millumbili, sigur Magnus Rasmussen í svarinum til Helga Abrahamsen.