Aftur loyvt at fleyga lunda í Skúvoy

Nú verður aftur loyvt at fleyga eitt avmarkað tal av lunda í Skúvoy, har veiðan annars hevur verið bannað í 15 ár. Hetta var avgjørt á grannastevnuni, sum var í Skúvoy um vikuskiftið. 

Ongar teljingar fyriliggja, men meira lundi er at síggja nú enn seinastu árini, sigur Harry Jensen, sum er bygdaráðslimur í Skúvoyar kommunu.

- Tá eingin lundi var, so kundu vit tað sama hava hann friðaðan. Men nú er stovnurin í framgongd. Tað er nokk serliga tað yngra ættarliðið, sum næstan ikki hevur roynt at fleyga lunda, sum er serliga áhugað at sleppa framat, sigur hann.

Loyvi við avmarkingum

Tað var semja millum skúvingar at friðingin partvíst skuldi avtakast. Men hendan semjan var eisini treytað av avmarkingunum á lundaveiðuni. 

- Fyrr kundi man fleyga frá 2. juni og so leingi, sum lundin var, og tað kundi verið heilt út í august mánaða. Nú eru rættiliga nógvar avmarkingar á, sigur Harry Jensen. 

Loyvt er at fleyga lunda í einum 14-daga tíðarskeiði, og harumframt hevur hvør matrikkul loyvi til at fleyga í mesta lagi 50 lundar. Eigur ein persónur fleiri matriklar, tá er kortini einans loyvt at fleyga 50 lundar. 

Galdandi næstu trý árini

Treytirnar eru galdandi í trý ár, tá friðingin verður endurskoðað, sigur Harry Jensen. 

Tað eru einans fólk, ið eru búsett í Skúvoy, og jarðeigarar í Skúvoy, sum fáa slík loyvi. 

Á grannastevnuni var eisini samtykt at taka færri lírar enn higartil. Grannastevnan er almenn, men atkvøðurætt hava tey, sum eiga jørð í oynni.