Frælsur ítróttur: enn eitt met fallið

Jónas Isaksen hevur sett enn eitt føroyskt met.

Fyrr í dag tók hann metið hjá Tóri Mortensen á 400 metra renning, og nú var tað nærum 23 ára gamla metið hjá Ása Mikkelsen í longdarlopi, sum stóð fyri falli.

Í evropameistarakappingini fyri ung undir 18 ár leyp Jónas Isaksen 7,15 metrar, og tað er fimm sentimetrar longri enn gamla metið frá 1999.

Jónas Isaksen leyp seg við metlopinum í finaluna í longdarlopi, sum verður týsdagin.

Eiri Glerfoss kappaðist eisini í longdarlopi seinnapartin. Hann leyp eisini væl og kom út á 7,03m, men tað var ikki nóg mikið til finaluna.

Teir báðir umboða danska landsliðið í EM fyri U-18, sum er í Ísrael.