Eingin avgerð tikin um at hækka tøkugjaldið

Hóast laksaprísurin hevur verið óvanliga høgur seinastu tíðina, er framleiðslukostnaðurin hjá alivinnuni eisini hækkaður.

Ætlanin er tí at tillaga tøkugjaldið, so tað endurspeglar nýggja veruleikan.

Tað segði løgmaður í røðu sínari á ólavsøku.

Hann segði einki um, at ætlanin er at hækka gjaldið.

Magnus Rasmussen

Magnus Rasmussen, landsstýrismaður í vinnumálum.

Kanna prísmunin

Og eingin avgerð er tikin um tað, sigur Magnus Rasmussen, sum umsitur alingina í landsstýrinum.

Munurin millum prís og framleiðslu verður kannaður, áðrenn nøkur avgerð verður tikin, sigur hann.

Nú er tøkugjaldið hálvt prosent, tá kilo kostar minni enn 32 krónur, tað er 2,5 prosent, tá kiloprísurin er millum 32 og 36 krónur, og tøkugjaldið er fimm prosent, tá prísurin fer upp um 36 krónur.