Brunateknikarar úr Danmark skulu kanna eldin við Ljósá

Í næstu viku koma serfrøðingar á brunateknisku deildini hjá politinum í Danmark til Føroya at kanna stóra eldin við Ljósá. 

Tað skrivar Portalurin.

Eldur kyknaði í einum vinnubygningi hjá KJ Sandblásing um hálvgun seks-tíðina týskvøldið, og ikki fyrr enn beint fyri klokkan tíggju var eldurin sløktur.

Helvtin av bygninginum fór í eldinum, og klædningurin á grannahúsunum, sum KJ eisini eigur, hevur fingið skaða.

Eisini fekk ein bilur, ið stóð nærhendis, skaða av nógva hitanum frá eldinum.

Politiið hevur gjørt kanningar á staðnum, men enn er ikki greitt, hví eldurin kyknaði. Tað skulu danskir brunateknikarar kanna nærri.