Varaskúlastjórin í Vestmanna fingið ætlanarskriv um uppsøgn

Varaskúlastjórin í Vestmanna skúla, Fríðgerð Ovadóttir, hevur fingið ætlanarskriv um uppsøgn.

Tað váttar Jóna Seloy, forkvinna í skúlastýrinum í Vestmanna, fyri Kringvarpinum.

Fríðgerð Ovadóttir, varaskúlastjóri, er ikki til arbeiðis í løtuni. Útvarpið hevur tosað við hana, men hon hevur ongar viðmerkingar til málið.

Útvarpið hevur eisini tosað við lærarar í Vestmanna skúla. Teir vátta, at annað fólk er sett sum varaskúlastjóri fyribils.

18 lærarar hava kært

Tað hevur ikki eydnast okkum at fáa viðmerking frá Alis Jónu Højsted, skúlastjóra.

Beint fyri summarfrítíðina sendu 18 av 26 lærarum kæru til Mentamálaráðið, skúlastýrið í Vestmanna og Lærarafelagið um arbeiðslagið hjá skúlastjóranum.

Lærararnir eru ónøgdir við arbeiðsháttin hjá skúlastjóranum.

Kæran frá lærarunum og hoyringarsvarið hjá skúlastjóranum verða viðgjørd í Uttanríkis- og mentamálaráðnum.