Botnbrak á Argjum

AB tekur ímóti NSÍ í botnbraki í Betri-deildini við monnum í dag.

Argjamenn liggja á áttanda plássi, eitt stig frammanfyri gestirnar úr Runavík, sum liggja undir niðurflytingarstrikuni í løtuni.

Sámal Erik Hentze, sum fyrr í ár stóð á odda fyri AB-skútuni, skal nú sum NSÍ-venjari royna at yvirhála argjamenn í kappingini um at sleppa undan niðurflyting.

Kapping um fjórða plássið

Við Margáir tekur EB/Streymur ímóti B36. Liðini bæði kappast í løtuni um fjórða plássið, sum kann geva pláss í evropeiskum fótbólti næsta ár.

B36 hevur tvey stig fleiri og ein dyst færri enn EB/Streymur, so ein sigur til árstalsfelagið kann gerast avgerandi.

Toppur ímóti botni

Toppliðini KÍ, Víkingur og HB hava øll uppgávur, sum tey á pappírinum eru favorittar til at loysa.

KÍ tekur ímóti 07 Vestur, Víkingur skal spæla ímóti B68 í Sarpugerði og HB fær Skála á vitjan í Gundadali.