Noreg og Russland samráðast um fiskiveiðiavtalu

Samráðingar vera í næstum millum Noreg og Russland um fiskiveiðuavtalu.

Norska fiskimálaráðið váttaði í morgun fyri norska kringvarpinum, at um tvær vikur fara norskir og russiskir myndugleikar at samráðast um fiskiveiðu.

Hetta hendir samstundis, sum nógv kjak er um trygdina hjá russiskum fiskiskipum í norskum sjógvi.

Fundurin um fiskiveiðuavtalu millum londini verður talgildur, og fleiri embætisfólk vera á fundinum.

500.000 tons

Granskarar mæla til at fiska 500.000 tons av toski, sum verða býtt javnt millum Noreg og Russland.

- Tað skerst ikki burtur, at hetta er ein sera óvanlig hending, tá vit hugsa um óvanligu støðuna, sum vit eru í. 

Tað sigur Geir Hønneland, norskur granskari og PhD í politikki, við NRK.

Floksformenn í Tinganesi um tiltøk móti Russlandi, floksformenn í Tinganesi

Umboð fyri politisku flokkarnar á fundi við løgmann í Tinganesi um viðurskiftini millum Føroyar og Russland.

Føroyar ikki tikið støðu

Her heima hevur landsstýrið enn ikki tikið støðu til møguligar samráðingar við russar.

Eftir at løgmaður seinasta mikudag hevði havt drúgvan fund við forfólkini í politisku flokkunum, staðfesti hann, at støðan er álvarslig. 

Og tí ræður um, at vit í Føroyum eru samd um tað, vit gera, segði hann.

Løgmaður til Noregs

12. oktober skal Bárður á Steig Nielsen til Noregs at hitta norska forsætisráðharran, Jonas Gahr Støre.

Og ætlanin er at hitta forfólkini í politisku flokkunum um miðjan oktober, tá hann er afturkomin úr Noregi.

Vit hava roynt at fáa eina viðmerking frá løgmanni, nú norskir myndugleikar hava boðað frá, at Noreg fer at samráðast við russar.

Løgmaður hevur ikki svarað enn.