Brandur fingið nýtt felag

Brandur Halgirsson er farin úr Ajax København, sum týsdagin varð koyrt á húsagang, til Team Sydhavsøerne, sum kappast í næstbestu donsku hondbóltsdeildini, skrivar folketidende.dk.

Føroyingurin, sum fyrst og fremst er stinnur í verjuspælinum, hevði annars verið í Ajax í fýra ár, men nú besta liðið hjá høvuðsstaðarfelagnum varð koyrt niður í fjórðu deild, hevur 23 ára gamli Brandur Halgirsson funnið sær nýtt felag. Hann hevur skrivað undir trý ára sáttmála við felagið úr Lollandi.

 - Eg havi hoyrt nógv gott um Team Sydhavsøerne. Liðið er gott og hevur ein góðan heimavøll, og eg eri glaður fyri at gerast ein partur av felagnum, sigur Brandur Halgirsson við folketidende.dk.

 - Eg fari fyrst og fremst at royna at styrkja um liðið og annars at menna meg sum spælara. Tað kann eg her við venjaratoyminum og umstøðunum annars.

 - Síðsta tíðin í Ajax hevur bæði verið hørð og lærurík, har eg havi lært nógv um meg sjálvan. Eg havi havt tíð til at hugsa um, hvat eg vil, og niðurstøðan hevur verið, at eg skal halda fram við hondbólti. Tí eri eg her nú, sigur fyrrverandi H71-spælarin, sum kanska fær sín fyrsta dyst ímóti Roskilde sunnudagin.

Venjarin, Nick Szwiec, er fegin um at hava fingið føroyingin, sum hevur spælt 20 dystir á landsliðnum, á sítt lið. 

 - Vit leitaðu eftir einum verjuspælara longu áðrenn kappingarárið byrjaði, so hetta kemur væl við. Brandur er sterkur kropsliga, og kennir væl deildina, sigur venjarin við folketidende.dk.