Tjentu 66 mió. kr. upp á negativa rentu í fjør

Í 2021 fingu føroysku peningastovnarnir 66 mió. kr. í inntøkum frá negativum rentum fyri innlán hjá sínum kundum.

Fyrsta hálvár í ár hava inntøkurnar hjá bankunum frá negativu rentunum verið 35 mió. kr. Altso góðar 100 milliónir krónur upp á hálvt annað ár.

Tað upplýsir Landsbankin.

Byrjaði í 2019

Føroysku bankarnir hava síðani seinnu helvt av 2019 kravt negativa innlánsrentu frá sínum kundum, tí innlánsrentan í Tjóðbankanum tá var negativ.

Av tí at útlánsrentan í Tjóðbankanum er hækkað, hækka føroysku bankarnir eisini sínar útlánsrentur.

Føroysku peningastovnarnir hava fyri stuttum boðað frá, at bæði útláns- og innlánsrentan fer at hækka; hjá BankNordik, Betri Banka og Suðuroyar Sparikassa við endan av september, og hjá Norðoya Sparikassa við endan av oktober.

Hálsatjørn, Bank Nordik, Tórshavnar kommuna

Størri rentuútreiðslur

Fyri føroysku húsarhaldini merkir hægri renta øktar rentuútreiðslur av bæði bústaðarláni, billáni og aðrari skuld í bankanum.

Ein rentuhækking rakar ymiskt alt eftir, hvussu væl fyri fíggjarliga einstaka húskið er, men er skuldin stór, kann ein rentuhækking ávirka tøkupeningin munandi. Eisini vinnan fer at merkja hægri rentur, sigur Landsbankin.