Nations League fyri kvinnur á veg

Næsta ár byrjar Nations League fyri kvinnur.

Tað hevur evropeiska fótbóltssamgongan, UEFA, kunngjørt, sambært fleiri altjóða miðlum.

Fleiri hava ynskt eina slíka kapping afturat EM og HM-undankappingunum, og UEFA boðar nú frá, at fyrsta útgávan av kappingini byrjar á heysti í 2023. 

Eisini venjarin á føroyska landsliðnum, Lene Terp, og liðskiparin á føroyska landsliðnum, Ásla Johannesen, halda, at ein slík kapping hevði komið væl við.

 - Har skulu vit spæla ímóti liðum, sum eru á okkara stigi og hava somu fyritreytir fyri at vera góð, tí tað snýr seg eisini í stóran mun um, hvørjar fyritreytir tú hevur, segði Lene Terp við Kringvarpið í september, og liðskiparin tók undir við henni.

 - Tað er eingin loyna, at tað er stuttligt at spæla ímóti heimselituni og tínum fyrimyndum, men tað er betri fyri øll lið at spæla ímóti onkrum á sama stigi. Tað hevði verið gott fyri okkum, um vit sloppu at spælt dystir, sum telja, ímóti liðum nærri okkara stigi, segði Ásla Johannesen í september.

Tríggjar deildir

Londini verða býtt upp í tríggjar deildir eftir styrkismetingini, og eins og hjá monnunum ber til at flyta upp og niður ímillum deildirnar.

Uppskotið til nýggja kapping varð lagt fram fyri limalondunum í Frankfurt í oktober, og nýggi kappingarleisturin var góðkendur av starvsnevndini hjá UEFA í gjár.

 - Tíðin er komin at menna landsliðsfótbóltin við kvinnum, sigur UEFA-forsetin, Aleksander Ceferin, sambært fleiri miðlum.

 - Vit hava bygt eina opna, kappingarføra og samanhangandi kapping, har allir dystir hava týdning, sigur forsetin.