Vilja hava dómstólar í Iran at døma strangari

227 av teimum 290 tjóðartingslimunum í Iran heita á dómstólarnar um at fara harðari fram ímóti teimum, sum mótmæla í landinum, og harvið bróta landsins lógir.

Tað skrivar Reuters.

Kring heimin eru myndir at síggja av iranskum kvinnum, sum klippa hárið av sær og brenna turrikløð, fyri at mótmæla viðferðini av kvinnum í landinum. Tað hevur kynt undir eina varisligari vón um betri kor í Iran.

Mótmælt í sjey vikur

Men leiðslan í Teheran er alt annað enn nøgd við mótmælini, sum nú hava vart í sjey vikur.

Upptøkur seinastu dagarnar hava víst, at trygdardeildirnar fara harðliga fram ímóti teimum, sum mótmæla.

Sambært norska felagskapinum, Iran Human Rights, hava trygdardeildirnar gjørt av við minst 304 fólk undir mótmælunum.