Lopið undan vegi í Gásadali

Fríggjamorgunin varnaðust tey í Gásadali, at lopið er undan vegnum, sum gongur oman til lendingina. Staðkend fólk siga, at tí kann tað vera vandamikið hjá ókunnufólki at fara hagar.

– Hetta er eitt stað, har mestsum øll ferðafólk fara, ið koma til Gásadals, og tá ið tað er sum mest, kunnu tað vera millum 50 og 70 fólk, sum koma við bussum. Hjá so mongum hevði ikki verið ráðiligt at gingið har, verður sagt úr Gásadali.

– Fyri nakað nógvum árum síðani var koyrandi har við traktori, men ein steinur er fyri, so tað ikki ber til longur. Vegurin hevur verið linur leingi, so myndugleikarnir áttu at hugt at, um ikki okkurt skal gerast.

Tá ið ferðandi koma til Gásadals og vilja hava ta kendu sjálvsmyndina av sær við Múlafossi í baksýni, er tað júst eftir hesum vegnum, tey eru farin, fyri at fáa rætta útsýnið.

– Verið varin og hugsið tykkum um, áðrenn sjálvsmynd við fossinum verður tikin, verður sagt á Facebook-síðuni “Tøðan í Gásadali”.