Verkfall hóttir aftur SAS

Eitt nýtt verkfall kann raka SAS, um tað ikki eydnaðst flogfelagnum at fáa sáttmála við norska fakfelagið fyri tey umleið 500 starvsfólkini hjá SAS. 

Sum liður í endurreisingarætlanini fyri SAS, skal felagið finna sparingar fyri 7,5 milliardir svenskar krónur, og ein partur av hesum eru sparingar í lønarútreiðslum. 

Fyribils hevur tað ikki eydnast at fáa semju við norsku starvsfólkini.

- Málið er at fáa eina semju í lag, men tað eru tveir partar, og fyribils hava vit einki fingið á borðið, sum vit kunnu skriva undir uppá, sigur Elin Roverudseter, sum er forkvinna fyri norsku starvsfólkini. 

Í dag fara partarnir á semingsfund. Um tað ikki eydnast at fáa semju, tekur gerðarrætturin við, og so kann tað enda við verkfalli, um ongin semja um nýggjan sáttmála verður fingin í lag.