Infantino missir íslendskan stuðul

Íslendska fótbóltssambandið, KSÍ, stuðlar ikki Gianni Infantino, sum stillar upp aftur til forsetavalið í FIFA, skrivar In.fo. 

Núverandi FIFA-forsetin er einasta valevni, og tí er eingin ivi um, at hann verður afturvaldur, tá aðalfundurin verður í Rwanda 16. mars.

Atfinningarnar ímóti Gianni Infantino hava verið nógvar - serliga í samband við HM í Katar - og tí hava fleiri av norðurlendsku londunum alment tikið stuðulin aftur.

Noreg, Danmark og Svøríki hava øll boðað frá, at tey ikki stuðla Gianni Infantino, og nú hevur Ísland gjørt tað sama. 

 Sambært fotbolti.net, sum in.fo endurgevur, sigur forsetin í KSÍ, Vanda Sigurgeirsdóttir, at tey ikki eru nøgd við leiklutin hjá Infantino undir HM-endaspælinum í Katar, har millum annað sýtt var liðum at gera politiskar markeringar við OneLove-liðskiparabondum.

Forsetin í føroyska fótbóltssambandinum, Christian Andreasen, segði við 3-2 síðst í november, at spurningurin ikki var viðgjørdur í FSF, men at tað var ósannlíkt, at FSF fór at taka stuðulin til Gianni Infantino aftur.