Ongantíð hava so nógv fólk starvast í Føroyum

Teir nógvu útlendingarnir, sum koma til Føroya at arbeiða, síggjast aftur í løntakartalinum.

Knappliga eitt prosent fleiri løntakarar vóru í desember í fjør enn í desember í 2021.

Bróðurparturin av vøkstrinum eru løntakarar, sum hava annan enn danskan ríkisborgaraskap, skrivar Hagstovan.

asfaltarbeiði, arbeiðsfólk

Met í desember í fjør

Í desember í fjør vóru stívliga 28.300 fólk í løntakarafjøldini í Føroyum, 250 fleiri enn í desember í 2021, og tað er met fyri ein einstakan mánað.

Av teimum vóu 14.600 menn og 13.700 kvinnur løntakararar. 

Løntakarafjøldin veksur framvegis, men ikki við somu ferð sum fyri koronufarsóttina, skrivar Hagstovan. 

arbeiði, arbeiðsfólk

Fleiri og fleiri útlendingar

Alsamt størri partur av løntakaraskaranum hevur annan enn danskan ríkisborgaraskap, skrivar Hagstovan. 

Av teimum 250 fólkunum, sum eru komin aftrat, hava 200 annan enn danskan ríkisborgaraskap.

Í desember høvdu 7,0 prosent av løntakarunum annan enn danskan ríkisborgaraskap. 

Tey vóru 6,3 prosent í desember í 2021.

Fyri tíggju árum síðani vóru tey bara 2,5 prosent.

arbeiði, arbeiðsfólk

Myndir : © Bjarni Árting Rubeksen