Landið væntar nú at fáa 18,2 milliónir krónur fyri partabrøvini í Tjaldri

Higartil er annars roknað við sjey milliónum.

Men grannskoðanarvirkið Januar, sum selur partabrøvini fyri landið, metti, at ognarparturin hjá landsstýrinum er verdur 18,2 til 23,1 mió.kr.

Januar heldur, at P/f Tjaldur er 650 til 825 milliónir vert. 

Landið eigur 2,8 prosent í Tjaldri.

Nú eru 18,2 mió. kr. í uppskotinum hjá Fíggjarmálaráðnum um broytingar í bráðfeingis játtanarlógini fyri 2023.

Gerðarbýtið kostar 3,7 mió. kr.

Gerðarbýtið millum Tórshavnar kommunu og landið kostar landinum 3,7 mió kr. netto.

Talan er um fastogn hjá landinum í Hoydølum og hjá kommununi á Frælsinum. 

Landsstýrið ætlar at keypa grundstykki til framtíðar útbygging av Landssjúkrahúsinum. Tað kostar 4,25 mió. kr. Avtala er gjørd um keypið. 

Og tvær milliónir skulu brúkast til at fyrireika leigumál til umsitingarbygning til løgtingslimirnar. 

Løgtingslimir skulu flyta í bygningin hjá Havnar arbeiðarafelag við Tinghúsvegin, har Landsverk og stjórnarráð húsast nú.