Landsverk dømt at rinda 20.000 kr. fyri oljudálking í Froðba

Landsverk er dømt at rinda 20.000 kr. í sekt fyri brot á umhvørvisverndarlógina, tá 1800 litrar av flúgvarabensini fóru út í lendið við tyrlupallin í Froðba náttina millum 22. og 23. januar 2018.

Tað var Effo, sum bunkraði til Landsverk, sum umsitur tyrlupallarnar.

Sambært ákæruvaldinum vóru bæði Effo og Landsverk sek í, at flúgvarabensinið fór út í lendið, men Føroya rættur hevur fríkent Effo.

Froðba, Tvøroyri

Kravið var 150.000 kr. 

Ákæruvaldið kravdi, at Landsverk fekk sekt upp á 150.000 kr., og Effo fekk hækkaða sekt upp á 200.000 kr. fyri brot á umhvørvisverndarlógina, tí Effo er dømt fyri eitt líknandi mál í 2016. 

Bæði Landsverk og Effo noktaðu seg sek.

Tann, sum eigur lendið, krevur endurgjald.

Tað hevur ikki eydnast okkum at fáa fatur í stjóranum í Landsverki til eina viðmerking um, hvørt Landsverk tekur við dóminum, ella um málið verður skotið inn fyri hægri rætt.