ES-reglur um tiltøk móti Russlandi skulu setast í gildi í Føroyum

Morten Bødskov, vinnumálaráðharri, hevur gjørt uppskot um eina lóg, sum áleggur Føroyum at seta í gildi ES-reglur um tiltøk móti Russlandi og Hvítarusslandi í sambandi við innrásina í Ukraina.

Talan er um málsøki, sum Føroyar ikki hava yvirtikið.

Uppskotið er sent til hoyringar í Føroyum. Hoyringarfreistin er til 8.februar.

Uppskotið skal viðgerast í løgtinginum og í fólkatinginum samstundis.

Fær fíggjarligar avleiðingar

Morten Bødskov sigur, at myndugleikar í Føroyum hava upplýst, at lógin fer at fáa fíggjarligar avleiðingar fyri partar av vinnulívinum í Føroyum.

Lógaruppskotið um ES-reglurnar í Grønlandi er longu til viðgerðar í fólkatinginum.

Tað er nú í grønlandsnevndini.