StÍF sendir neyðhjálp til Turkalands

Á vestara armi av Skálafjørðinum kennist vanlukkuliga støðan í Turkalandi eftir jarðskjálvtan meira nærverandi enn aðrastaðni í landinum. 

Høvuðsvenjarin hjá StÍF, Berkan Otman, er úr Turkalandi, men býr í Føroyum saman við konu síni Manolya og tveimum synum.

Turkaland, Jarðskjálvti

StÍF skrivar í tíðindaskrivi, at Berkan hevur fleiri vinfólk í økjunum, sum eru rakt av jarðskjálvtanum. Onkur av vinfólkum venjarans eru ikki komin afturíaftur. 

Tí hevur ítróttarfelagið tikið stig til at senda neyðhjálp til fólkini í Turkalandi, har talið av deyðum eftir jarðskjálvtan í bæði Sýria og Turkalandi nú er yvir 15.000 fólk

"Nógv fólk hava mist hús og heim, og tað er kalt í Turkalandi í løtuni. Tí hava vit í StÍF valt at gera eina roynd at hjálpa við heitum klæðum. Tað er okkara vón, at hjálpin fer at gera mun fyri tey menniskju, sum fáa hesa hjálpina úr Føroyum," sigur Rúni Rasmussen, formaður í StÍF, í tíðindaskrivinum. 

Turkaland, Jarðskjálvti

10 stórir pakkar 

StÍF hevur saman við Rumeniahjálpini á Strondum pakkað 10 stórar eskjur, ið eru klárar at senda við flogfrakt.

Í eskjunum eru góð og heit klæði, teppi, jakkar, sápa og annað.

Turkaland, Jarðskjálvti

Turkiska sendistovuna í Keypmannahavn skipar fyri, at hjálpin verður flogin sum skjótast úr Keypamannahavn til Turkalands og førd víðari til vanlukkuøkini.

Neyðhjálpin fer úr Føroyum í hesi vikuni, og gongst sum ætlað, kemur hjálpin til tey neyðstøddu um fáar dagar.