Dagstovnar: Starvsfólk skulu fáa betri løn og betri umstøður

Betri løn og betri arbeiðsumstøður skulu fáa starvsfólk í dagsstovnum at støðast og draga fleiri fólk til stovnarnar.   

Ætlanin er at gera tað lættari hjá hjálparfólkum at fáa sær námsfrøðiútbúgving.

Og landsstýrismaðurin fer at seta arbeiðsbólk at gera álit um dagføringar í dagstovnalógini.

Tað sigur Djóni Nolsøe Joensen, landsstýrismaður, í svari til Liljuna Weihe, tingkvinnu.

Hann sigur, at landsstýrið, Kommunufelagið og Hagstovan fara at menna hagtalsskipanina um barnamenning, so tey vera álítandi, góðskutryggjað og altjóða sambærlig.

Djóni Nolsøe Joensen

Djóni Nolsøe Joensen, landsstýrismaður. (Mynd: Bjarni Árting Rubeksen)

Liljan Weihe

Liljan Weihe, løgtingskvinna. (Mynd: Bjarni Árting Rubeksen)

Dagstovnalógin verður ikki hildin    

Djóni Nolsøe Joensen ásannar, at dagstovnarnir klára ikki at halda ásetingina í dagstovnalógini um, at í minsta lagi tveir triðingar skulu vera námsfrøðingatímar, og í mesta lagi ein triðingur hjálparfólkatímar.

Orsøkin er starvsfólkatrot.

Tí vera tveir flokkar við námsfrøðilesandi tey komandi árini. Og tillagingar eru gjørdar í námsfrøðiútbúgvingini, so størri dentur verður lagdur á dagstovnanámsfrøði.  

Annars fer landsstýrismaðurin, sigur hann, fyrst og fremst gjølla at nærlesa tilmælið frá Dagstovnaráðnum um, hvussu vit kunnu tryggja, at børn fáa góðar, tryggar og mennandi umstøður á dagstovnaøkinum.