Betri: Framvegis bústaðartrot, men batar eru at hóma

Bústaðartrotið er framvegis stórt. Tørvur er á umleið 1100 búeindum, men batar eru at hóma.

Tað metir Betri Banki, sum á heimasíðu síni í dag skrivar, at útboðið av nýggjum bústøðum hevur ikki kunnað fylgt við stóra fólkavøkstrinum, sum hevur verið seinastu 11 árini.

Frá 2012 til 2022 vaks fólkatalið í Føroyum 13 prosent, og samstundis hækkaði miðal sethúsaprísurin 103 prosent.

Byggja meir í høvuðsstaðarøkinum

Nú hómast batar, og vøksturin á nýggjum búeindum er nú størri ella á sama stigi sum fólkavøksturin, sigur Betri Banki.

- Vit byggja nú meira, og í mun til fólkatalið eru vit raskari at byggja nýggjar búeindir í høvuðsstaðarøkinum samanborið við restina av Føroyum.

- Enn er tó langt eftir á mál, áðrenn vit hava ein sama fjølbroytta bústaðarmarknað sum í Danmark. Vilja vit hava sama lutfall millum búeindir og fólkata,l sum var í 2012, so mangla umleið 1100 búeindir í Føroyum, og av teimum mangla 630 í høvuðsstaðnum, sigur Betri.